НОВОГОДИШНИТЕ ЧЕСТИТКИ НА ИВАНА – ОД КРЕАТИВНОСТ ДО ДОНАЦИЈА ЗА БЕЗДОМНИТЕ МИЛЕНИЦИ ВО АМОС – СКОПЈЕ НОВОГОДИШЕН НАСТАН ВО ЛУНА ПЕТ, САБОТА 14.12.2024

Огромно ни е задоволството да Ве поканиме на дружба со Ивана, од аспект што ни е првата креативна уметничка и хуманитарка од тимот на мачки која ќе гостува кај нас во Луна Пет.

Како што таа вели: „Отсекогаш сум сакала миленици, откако памтам за себе сум била опкружена главно со мачки и по некое куче. Сега имам мачка по име Ума, тигрест бунтовник што знае и да се погали понекогаш. Пред речиси 10 години ја најдовме надвор болна, ја прибравме за да ѝ помогнеме и да ѝ најдеме дом, но веднаш се приврзавме со неа и си остана кај нас.“

Поттикната од љубовта кон уличните мачки и кучиња, со главните придружници: инспирација од нејзината мачка Ума, огромната желба да им помогне на бездомните миленици, страста кон цртањето и креативните идеи кои ги преточува во своите иновативни креации, вредните раце на Ивана создадоа прекрасни Новогодишни честитки во кои главната улога ја имаат мачињата и кучињата.

Водена од желбата да помогне, таа овие новогодишни честитки со огромна љубов сама ги креираше и ги испечати, а средствата од нивната продажба ги намени за донација за храна во Здружението за заштита на животни АМОС – Скопје.

Доколку и Вие сакате да бидете дел од оваа приказна, да учествувате во оваа хуманитарна акција и да придонесете нивните опавчиња во пресрет на Новогодишните празници да бидат разиграни, со големо нетрпение Ве очекуваме во Луна Пет во сабота на 14.12.2024 година, од 11:00 до 14:00ч.

Освен новогодишните честитки, нејзината креативност ќе ја видите и во експонатите на извонредно рачно изработениот филигран, за чија техника за изработка, како што вели Ивана: „учев кај најдобриот учител, Александар Милев од Еклектика и денес работам филигран под името purr.handcraft“.

Денот ќе ни биде исполнет Новогодишно, со Новогодишни честитки, настанот за најмалите дечиња „Обои ме Новогодишно“ и секако, со подарок за секој миленик.

Со душа Ве чекаме,

Ивана, АМОС-Скопје и Тимот на Луна Пет